رئيس مجلس الادارةعبير عيد سليمان
رئيس التحريرصلاح عبد المنعم

نيابة القاهرة |..تعاقب المتحرش بفتاة المترو .. باخلاء سبيل المتهم.. والفتاة”أنا قولت القانون هيجيبلي حقى”

نيابة القاهرة |..تعاقب المتحرش بفتاة المترو .. باخلاء سبيل المتهم.. والفتاة”أنا قولت القانون هيجيبلي حقى”

كتب |محمد علاء

قد أعلنت سلمى سامي الفتاة التي تم التحرش بها من قبل شاب بمحطة مترو كويري القبة، أنه تم إخلاء سبيل المتهم و قد عقبت على رد فعل النيابة فى السطور الاتية ، عن طريق حسابها الشخصى على موقع التواصل الاجتماعى فيسبوك :

عشان ناس كتير بتسألني عملت ايه في المحضر اللي محرراه ضد متحرش وليه ساكته ف انا هقول الموضوع تاني من اوله.
يوم الجمعه 8/5/2015 اتعرضت لتحرش الساعه 2 الضهر وانا رايحه اركب من محطة مترو كوبري القبه عملت محضر في نقطة شرطة سرايا القبه، اول حاجه كانو عايزين يخلوه محضر معاكسه بعدين لما صممت على كونه محضر تحرش المأمور فضل مخلي المحضر عنده ومكانش راضي يبعته لقسم الحدايق عشان يتسجل في دفتر الاحوال ولما كلمت وحدة مكافحة العنف ضد المرأه التابعه لوزارة الداخليه عشان اشتكي *واللي هما تواصلوا معايا بعد الواقعه ب 4 ايام* لقيت رقمين مقفولين ورقم مبيردش ومع اصراري و الناس اللي وقفوا معايا وفضلوا رايحين جايين ع القسم عشان يجيبوا رقم المحضر لقيت تاني يوم الصبح بدري الرائد اللي عملي المحضر *واللي هو كان متعاطف معايا لان الولد اعترف قدامه في القسم انه اتحرش بيا وكان فاكر اننا هنحلها ودي* بيكلمني وبيديني الرقم وقالي اروح النيابه، روحت وهناك اهل الولد قدموا ورق للنيابه بيثبت ان ابنهم مختل ومعاق مع ان ابنهم ده *شغال في شركة أمن اسمها كوين سيرفس تابعه للقوات المسلحه* والنيابه عرضت الصلح صممت عالمحضر، مامة الولد فضلت تهددني انهم هياخدو حقهم مني وهيفضحوني ولما سألتها هي ازاي بتهددني وابنها متحرش قالتلي *اذا بليتم فاستتروا* ، كان معايا شاهدين بيثبتو صحة الواقعه النيابه مرضيتش تسمع شهادتهم وحجزت المحضر لحين ورود تحريات المباحث *اللي هي المفروض في صفي وبتثبت صحة الواقعه من لسان الظابط الي حرر المحضر* اتفاجئنا ان الولد اخد اخلاء سبيل بدأت اصعد الموضوع في الميديا لقينا النيابه بتكلم الشهود عشان يدلوا بأقوالهم وحصل وراحوا وقدمنا وقتها طلب بإيداع الولد في جهة طبية رسمية تقوم بتوقيع الكشف الطبي عليه وهي اللي تثبت كونه مريض ولا مش مريض، عشان المختلين مبيشتغلوش في شركات امن تابعه للجيش ولا بيتسابوا لوحدهم في الشوارع يرازوا في بنات الناس ولا بيخطبوا ويأسسوا أسر ويفتحوا بيوت وهما مش مسئولين عن تصرفاتهم، اتفاجئنا تاني ان النيابه بتحفظ المحضر من غير ما تبص في الطلب اللي قدمناه اصلا ومن غير ما تخاطب الشركه اللي الولد بيشتغل فيها وتسألهم ازاي مشغلينه وهو معاه ورق بيثبت انه مختل ف ع الاقل الشركه تفصله ويتحط في مستشفى يتعالج او تقول لاء مش مريض واعرف اخد حقي لكن النيابه اكتفت بأنها تقولي انتي متضايقه ليه ومكبره الموضوع ليه واحنا شايفينه عاقل بس هاتيلنا ورق يثبت انه مش مريض واحنا نحبسهولك وان عندهم قضايا ارهاب اهم بكتير قضايا التحرش وبترجعوا تسألوا بنكتأب ليه وبننتحر ليه وبنسيب البلد ونطفش ليه ، آخر حاجه عملناها اننا قدمنا تظلم عند المحامي العام ومحتاجه ضغط عشان يفتح التحقيق تاني وده هيبقى الامل الاخير ليا يا يوافق عالطلب يا يرفضه وميبقاش قدامي غير اني اسيب البلد عشان النفس اللي باخده هنا بقى فوق طاقتي و هفضل اتندم طول عمري على اني اكتفيت بضرب الولد ومعملتلوش عاهه مستديمه وقولت القانون هيجبلي حقي، القانون مبيجبش حق حد خدوا حقكم بإيديكم!11030646_864201423642550_7738483139247371631_o

شارك برأيك وأضف تعليق

جميع الحقوق محفوظه لموقع جريدة الحلم العربي نيوز | تطوير المركز العالمي لحماية التجارة الالكترونية 2021 ©