رئيس مجلس الادارةعبير عيد سليمان
رئيس التحريرصلاح عبد المنعم

الحب بطريقه أسماء قنديل.

الحب بطريقه أسماء قنديل.

download (1)

النهارده انا هتكلم فى موضوع مهم اوى وحيوى وشبابي وهتكلم بالعاميه عشان كلامى يدخل القلب بسرعه ويتفهم ..كلامى عن الحب ..الحب الى فيه صدق واخلاص وتضحيه عشان كل حبيب وحبيبه يوصلوا لليوم الى يكونوا فيه *زوجين * والاهم الحب الى فيه صبر على صعوبات الحياه الى بين كل اتنين بيحبوا بعض .. ..طول عمرى بحب افلام سعاد حسنى ورشدى اباظه وافلام فاتن حمامه وعمر الشريف وافلام شاديه وصلاح ذو الفقار بس عشان الرومانسيه والحب الحقيقى الصادق الى فيهم الى بينتهى بالجواز ..زمان كان الشاب راجل مع حببته وكان لما يوعدها بالجواز ينفذ وعده ليها ..والبنت بردو كانت بتصبر مع حبيبها وتستحمل ظروفه لحد مايجهز ويكون نفسه وحببته تستناه حتى لو قطر الجواز فاتها ..لكن دلوقتى بقينا فى زمن الكلام الحلو الى بدون افعال ..مع ان فيه شباب وبنات بيحبوا بعض حب زمان المحترم الى مليان صدق واخلاص ..بس لاسف دول نادرين اوى ..نادر لما اشوف شاب بيخاف على حببته من عيون الناس حتى من عيون اهله ..شاب بيغير على جسم حببته ..شاب بيراعى و بيتقى ربنا فى حببته ومخلص فى حبها ..شاب ممكن الشيطان يلعب فى دماغه ويكلم بنت ويتخيل انه حبها ..ولكن يرجع يندم ويفتكر انه ملوش غير حببته بس هى الى فى قلبه وهى شريكه حياته وزوجته المستقبليه ..شاب لسه عنده نخوه ورجوله نحيه حببته وميستحملش حد يتكلم عنها حتى لو بيمدح فيها ..ونادر بردو لما اشوف بنت مخلصه لحببها وصابره معاه وعندها استعداد تتحمل معاه كل المستحيل ..بنت تخاف من حبيبها كانه ابوها وتخاف عليه كانه ابنها ..بنت حنينه فى وقت الضيق تبقى ام لحبيبها واخت ليه يشكيلها همه وميخجلش لو دموعه نزلت قدامها هى بس ..بنت تحافظ على نفسها وتصون شرفها وعرضها عشان شايفه انها ملك لحبيبها الى بتتمنى يكون نصيبها ..بنت جدعه واقفه جمب حبيبها بكل قوتها ومؤمنه ان وراء كل رجل عظبم امراه عظيمه ..بنت حابه انها تكون ناجحه فى حياتها عشان تشرف نفسها وحبييها .. لكن لاسف دلوقتى بقت اغلبيه البنات عايزة شاب يااما شكله حلو وشهادته كويسه يااما عايزة شاب غنى اوى ..يعنى تفكير البنات بقا مادى ودى مش كله بردو ..وكمان الشاب بقا عنده علاقات كتيببر اوى وعايز يتجوز وحده محترمه ومش مهم بقا انه يحبها او يفهمها المهم انها تكون معروفه بالاحترام ..والجديد دلوقتى ان البنت ممكن ربنا يكرمها وتاخد الى بتحبه . بس بلاقيها بتتصرف مع حبييها باسلوب مليان سيطره وتحكم وكانها نسيت انها الست وهو الراجل ..المفروض البنت تعلى من شكل الراجل الى بتحبه فى عين الناس وتخلى الكل يحترمه ..مش يقولوا عليه ماشى وراها ..وبكده البنت دى هتضيع حب حبيبها ليها بغباء اسلوبها وطريقه تعاملها معاه…… بتمنى الرومانسيه والصدق والوفاء الى فى الحب يرجع تانى ..بتمنى الحب يبقى مبدا من مبادئنا ويارب كل اتنين بيحبوا بعض حب شريف ونقى يخلوا هدفهم هو الجواز الحلال ..ومعلومه لكل بنت ..خلى الدعاء و الصبر سر نجاح علاقتك ..بالاضافه لقربك من ربنا عشان مفيش علاقه بيكون ربنا موجود فيها وبتفشل ابدا وحتى لو حصل اى مشكله او خلل فى علاقتك مع حبببك هتلاقى ربنا حلها وعدت مع الايام ..لان ببساطه ربنا بيبقى عارف نيتكم وشاهد انكم عايزين تتجموعوا فى الحلال ..فاكيد هيساعدكم ويقف معاكم وهيبعد عنكم كل سوء ..وحبيبك لو فعلا ببحبك هتلاقيه من نفسه بيطلب منك انك تحافظى على صلاتك وعبادتك لانه هيكون شايف فيكى زوجه وام لاولاده فى المستقبل وحابب ان ربنا يكون معاكم دايما ..وعلى فكرة عمر الحب مكان بالهدايا الى بيجبها الحبيب لحببته ..الحب بيبان من غيرة وخوف حبيبك عليكى وازاى هو بيحافظ عليكى ..ومش لازم تحلمى بالشقه الفخمه والعفش الراقى اوى والشبكه الغاليه …سدقينى مفيش احلى من دبله فلوسها متحوشه بتعب وشقا عشانك انتى وشقه وعفش عاديين اوى وانتم مع بعض تكملوه وتخلوا بتكم احلى بيت فى الدنيا ..وبالنسبه للشاب..لو لقيت البنت الى تصبر معاك وتقف جمبك وتعلى من قيمتك وسط الناس وتكون ليك حبيبه وام واخت …ياريت تقدرها وتثبتلها انك فعلا راجل قد المسؤوليه وتكون نهايه حبكم جواز حلال …اتمنى مقالتى تنال اعجابكم واسفه لاستخدامى العاميه ولكن انا حبيت بساطه وسلاسه التعبير ..

شارك برأيك وأضف تعليق

جميع الحقوق محفوظه لموقع جريدة الحلم العربي نيوز | تطوير المركز العالمي لحماية التجارة الالكترونية 2021 ©